Yana bir muhim Qonun maʼqullandi

16:29 20 Noyabr 2020 Siyosat
427 0

Bugun, 20-noyabr kuni boʻlib oʻtayotgan parlament yuqori palatasining toʻqqizinchi yalpi majlisida “Koronavirus pandemiyasi va global inqiroz holatlarining iqtisodiyot tarmoqlariga salbiy taʼsirini yumshatish boʻyicha chora-tadbirlar qabul qilinganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Qonuni muhokama qilindi.

Mazkur Qonun bilan “2020-yil uchun Oʻzbekiston Respublikasining Davlat byudjeti toʻgʻrisida”gi Qonunga hamda Soliq kodeksiga oʻzgartish va qoʻshimchalar kiritilmoqda.

Oʻzgartirish bilan narx-navo oshib ketishining oldini olish maqsadida joriy yilning yakuniga qadar ayrim turdagi aksiz soligʻi stavkalarini oʻzgarishsiz saqlab turish nazarda tutilmoqda.

Qolaversa, qishloq xoʻjaligi yerlarini sugʻorish va baliq yetishtirish uchun foydalanilgan suv hajmlari boʻyicha soliq stavkalarining belgilangan miqdordan 50 foizga kamaytirilishi ham belgilanmoqda.

Taʼkidlash joizki, Qonun bilan alohida sharoitlarda, yaʼni koronavirus pandemiyasi sharoitida soliq majburiyatlarini bajarish belgilanadi. 2020-yilda Oʻzbekiston Respublikasi Prezidenti tomonidan soliqlarni va boʻnak toʻlovlarini toʻlashni foizsiz kechiktirish yoki boʻlib-boʻlib toʻlashni taqdim etish, shuningdek qoʻshimcha vaqtinchalik soliq imtiyozlarini berish nazarda tutiladi.

Bundan tashqari, soliqlardan yengilliklar taqdim etish boʻyicha mahalliy davlat hokimiyati organlariga beriladigan huquqlar ham oʻzgarishlarda oʻz aksini topmoqda.

Qonunning maʼqullanishi iqtisodiy islohotlar barqarorligini taʼminlashda muhim ahamiyat kasb etadi.

Qonun senatorlar tomonidan maʼqullandi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?