Surxondaryo viloyati markazi Termiz shahridagi 9-umumtaʼlim maktabi hududida zamonaviy, barcha talablarga javob beruvchi dzyudo zali yoshlar ixtiyoriga topshirildi.

Ushbu dzyudo zalining tantanali ochilish marosimida viloyat hokimi oʻrinbosari Ilhom Safarov, Termiz shahar hokimi oʻrinbosari Kamol Ashurov, viloyat xalq taʼlimi boshqarmasi boshligʻi Suluv Hamidova, Oʻzbekiston dzyudo federatsiyasi raisi oʻrinbosari Bekzod Toʻraboyev hamda milliy terma jamoa dzyudochilari hozir boʻlishdi.

Soʻzga chiqqanlar qisqa fursatda bunyod etilgan ushbu dzyudo zali mahalliy yoshlar hamda maktab oʻquvchilari uchun chinakam sovgʻa boʻlgani, kelajakda ushbu sport maskanidan Olimpiada va jahon chempionlari yetishib chiqishi, eng muhimi, ushbu zal dzyudo bilan shugʻullanadigan yoshlarning boʻsh vaqtlarini mazmunli tashkil etishi, salomatliklarini yanada mustahkamlashi uchun xizmat qilishini alohida taʼkidlashdi.

Jajji bolajonlarning qoʻshiq kuylab raqs tushishlari, yosh dzyudochilarning koʻrgazmali chiqishlari tantanali ochilish marosimida yigʻilganlarga koʻtarinki kayfiyat bagʻishladi.