Gipertoniya — dunyoda nogironlikni keltirib chiqaruvchi asosiy omillardan biri. Xususan, yuqori qon bosimi yurak va buyraklar faoliyatiga salbiy taʼsir koʻrsatib, bemorlarda erta oʻlim xavfini oshirishi mumkin.

AQSHning Texas universiteti olimlari ana shu asoratlarni tabiiy yoʻl bilan kamaytirish boʻyicha izlanishlar olib bordi. Tadqiqot besh yil davom etdi.

Kuzatuvlar uchun gipertoniya va mikroalbuminuriya (peshobda oqsil moddasi va qon plazmasida keratinin konsentratsiyasining qisman oshishi)dan aziyat chekuvchi 153 nafar koʻngilli jalb qilindi.

Ishtirokchilar uch guruhga boʻlindi. Birinchi toifa vakillari kuniga ikki-toʻrt stakandan ishqorli moddalarga boy meva-sabzavotlar sharbatlarini isteʼmol qilib bordi.

Ikkinchi guruh qatnashchilari har kuni toʻrt-besh tabletkadan ozuqa sodasi (natriy bikarbonat) qabul qildi. Uchinchi guruh ishtirokchilari shifokorlar tavsiyaga koʻra, standart ovqatlanish ratsioni boʻyicha taomlanishda davom etdi.

Yakunda koʻp miqdorda meva-sabzavot isteʼmol qilgan bemorlarda buyraklar faoliyati yaxshilanishi kuzatildi.

Qolaversa, tadqiqotchilar bunday ratsion gipertoniya bilan ogʻrigan bemorlarda yurak-qon-tomir va surunkali buyrak kasalliklaridan oʻlim xavfini sezilarli darajada kamaytiradi, degan xulosaga kelishdi.