Foto: DXX

Sirdaryo viloyatining Sirdaryo tumanida 5,5 ming dollar pora talab qilgan advokatga jinoyat ishi qoʻzgʻatildi. Bu haqda Davlat xavfsizlik xizmati xabar berdi.

Advokatlik byurosi advokati bu pulni oʻz xizmat mavqeyidan foydalangan holda, tuman IIB huzuridagi Tergov boʻlimi ish yurituvida boʻlgan jinoyat ishi boʻyicha gumonlanuvchi tariqasida jalb qilinib, hozirda Xovos tumanidagi 8-son tergov hibsxonasida saqlanayotgan fuqaroni Sirdaryo tuman IIB vaqtincha saqlash hibsxonasiga oʻtkazish hamda keyinchalik jinoyat ishini sudda uning foydasiga ijobiy hal qilib berish evaziga talab qilgan.

DXX va prokuratura organlari xodimlari tomonidan oʻtkazilgan tezkor tadbirda advokat 4,5 ming dollar va 6 million soʻm olgan vaqtida ashyoviy dalillar bilan ushlangan.

Taʼkidlanishicha, advokat jinoyat ishiga gumonlanuvchining huquqlarini himoya qilish maqsadida davlat hisobidan yuridik yordam koʻrsatish uchun jalb qilingan boʻlgan.

Hozirda unga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.