Samarqand shahrida Yoʻqolib ketish xavfi ostidagi yovvoyi fauna va flora turlarining noqonuniy savdosiga qarshi kurash toʻgʻrisidagi Konvensiya (CITES) ishtirokchi mamlakatlarining 20-konferensiyasi oʻz ishini boshladi.

Xalqaro forumning ochilish marosimida Oʻzbekiston Respublikasi Prezidentining ekologiya masalalari boʻyicha maslahatchisi — Ekologiya va iqlim oʻzgarishi milliy qoʻmitasi raisi Aziz Abduhakimov hamda CITES Bosh kotibi Ivonn Iguyero ishtirokchilarga murojaat qildi.

Taʼkidlanganidek, “CITES CoP20” tashkilotning 50 yillik tarixida muhim voqea boʻlib, tabiat va inson manfaatlari uygʻun rivojlanadigan kelajakni barpo etishga qaratilgan global saʼy-harakatlarni birlashtiradi.

Konferensiyaning Samarqandda uyushtirilishi xalqaro hamkorlikni mustahkamlashda navbatdagi qadam boʻlib, Oʻzbekistonning yovvoyi tabiatni muhofaza qilish va tabiiy resurslardan barqaror foydalanish borasidagi qatʼiy pozitsiyasini yana bir bor tasdiqladi.

Forumda 184 mamlakat va Yevropa Ittifoqidan 3000 dan ortiq vakil — davlat idoralari rahbarlari, xalqaro tashkilotlar, ilmiy doiralar, ekspertlar va nodavlat sektori ishtirok etmoqda. Asosiy eʼtibor bioxilma-xillikni saqlash, yoʻqolib borayotgan turlarni muhofaza qilishda xalqaro savdo mexanizmlarini takomillashtirish va global hamkorlikni kuchaytirish masalalariga qaratilgan.

Anjumanda kelgusidagi hamkorlik yoʻnalishlari ham muhokama qilindi. Jumladan, raqamli texnologiyalar va sunʼiy intellektni rivojlantirish maqsadida “Samarkand AI-Hub” maslahat platformasini yaratish, noqonuniy aylanmaga qarshi sanksiyalarni muvofiqlashtirish va javobgarlik choralarini kuchaytirishga qaratilgan yangi mexanizm ishlab chiqish taklif etildi.

5-dekabrga qadar davom etadigan “CITES CoP20” doirasida yovvoyi tabiatni himoya qilishga qaratilgan qator yalpi majlislar, Konvensiya ilovalariga oʻzgartishlar muhokamasi, tematik panellar va yuqori darajadagi uchrashuvlar oʻtkaziladi.

Abdulaziz YOʻLDOSHEV, “Xalq soʻzi”.