Temur Eshboyev/“Xalq soʻzi”. Navoiyda fuqaro aviatsiyasiga moʻljallangan boshqariladigan va uchuvchisiz uchish apparatlari ishlab chiqarish yoʻlga qoʻyiladi. Bu haqda viloyat hokimligi Axborot xizmati maʼlum qildi.

“Navoiy” erkin iqtisodiy zonasi direksiyasi AJ hamda Rossiyaning “Birinchi tajriba-konstruktorlik byurosi” MCHJ oʻrtasida umumiy qiymati 30 million dollarga teng SP–30 loyihasini amalga oshirish yuzasidan memorandum imzolandi. Loyiha uch yilda toʻliq amalga oshiriladi. Dastlabki mahsulot — ikki oʻrinli, toʻliq metall konstruksiyali samolyot — 2025-yil oktyabrida tayyor boʻlishi rejalashtirilgan. Uchinchi yilga kelib, yiliga 100 ta samolyot ishlab chiqarish moʻljallangan.

SP–30 yengil, xavfsiz va qulay boshqariladigan uchish apparati boʻlib, u 100 metrgacha boʻlgan tayyorlanmagan maydonlarga qoʻna oladi. Samolyot benzin yoqilgʻisida (AI–95) ishlaydi.

Bu loyiha amalga oshsa, Oʻzbekiston oʻz aviatsiya sanoatiga ega mamlakatlar safida munosib oʻrin egallaydi. Loyiha ichki bozor ehtiyojlarini qondirish bilan birga Yaqin Sharq, Markaziy va Janubiy Osiyo mamlakatlariga eksportni yoʻlga qoʻyish imkonini ham yaratadi.