“Doʻstlik” kanali bosh inshooti modernizatsiya qilingach, suv taqsimotini masofadan turib boshqarish yoʻlga qoʻyildi. Yaʼni endilikda suv toʻsish darvoza (shlyuz)larini keragicha ochish-yopish bevosita ofisdagi kompyuter orqali amalga oshirilmoqda.

— Bosh inshootimizda 2021 — 2024-yillardagi modernizatsiyalash doirasida amalga kiritilgan dastur asosida suv sathi va hajmi boʻyicha har doim aniq koʻrsatkichlarga ega boʻlish imkoniyati ham yaratildi, — deydi Guliston suv inshootlari va “Doʻstlik” kanali boshqarmasi bosh muhandisi Abdukarim Azimov. — Eng muhimi, ushbu avtomatik boshqaruv taqsimotni oʻz vaqtida aniq hamda toʻgʻri bajarish, suvni isrof qilmaslik kabi vazifalar toʻla-toʻkis bajarilishini taʼminlayotir.

Shuningdek, modernizatsiya doirasida kanalning bosh inshootga tutash oʻzani betonlashtirildi. Shu oʻrinda aytish joizki, mazkur yirik irrigatsiya tarmogʻining Guliston shahridan oʻtgan 4 750 metr qismiga 2016 — 2019-yillarda beton qoplamasi yotqizilgan edi. Natijada Sirdaryo viloyati markazining meliorativ holati tubdan yaxshilandi va kanal sohillari havas qilgulik darajada obod boʻldi.

Maʼlumot uchun: bundan bir necha kun avval 2025-yil uchun “WHIS Award” (Butunjahon irrigatsiya merosi) mukofotiga Oʻzbekistondagi “Doʻstlik” va “Eski Tuyatortar” kanallari loyiq deb topildi. “Doʻstlik” kanali 100-yildan ortiq vaqt ilgari bunyod etilgan.

Ahmadali ShERNAZAROV

“Xalq soʻzi”.