Foto: Xalq so‘zi

Sharqiy harbiy okrugning Fargʻona garnizoniga qarashli Quva tumanida joylashgan harbiy qismda “Mening akam – Vatan himoyachisi!” shiori ostida Buxoro shahridagi harbiy qism bilan telemuloqot tashkil etildi.

Unda Fargʻonadan Buxoroga va oʻz navbatida Buxorodan Fargʻonaga kelib, sharafli burchini bajarayotgan harbiy xizmatchilar hamda askarlar oʻz oila aʼzolari, ustozlari va doʻstlari bilan suhbatlashdi.

Tadbir doirasida qatnashchilar harbiy qismda yaratilgan sharoitlar, harbiylarning kundalik faoliyati, qoʻshimcha mashgʻulotlar jarayonlari bilan ham onlayn tarzda tanishdilar.

— Vatan himoyachilari kuni oldidan bunday mazmundagi tadbirlar qamrovini yanada kengaytiryapmiz, — deydi Sharqiy harbiy okrugning tarbiyaviy va mafkuraviy ishlar boshqarmasi katta ofitseri, mayor Farrux Sanayev. —  Vatanimiz tinchligi va xalqimiz osoyishtaligining kafolati boʻlgan Milliy armiyamiz qudrati bilan keng jamoatchilikni, xususan, yoshlarni yaqindan tanishtirish, shu orqali ularni vatanparvarlik ruhida tarbiyalashga hissa qoʻshish ushbu tadbirlarimizning bosh maqsadi hisoblanadi.

Botir Madiyorov, “Xalq soʻzi”.