Foto: www.google.com

Belarusda koronavirus bilan kasallangan birinchi bemor qayd etildi. Bu haqda mamlakat Sogʻliqni saqlash vazirligi xabar berdi.

Yangi turdagi COVID-19 koronavirusi mamlakatga Erondan kelgan talabada aniqlangan. U Belarusga Bokudan uchib kelgani aytilmoqda. “Bemor va u bilan muloqot qilgan shaxslar Minsk yuqumli kasalliklar shifoxonasida karantinga olingan”, — deyiladi xabarda. Idoraning taʼkidlashicha, bemorning ahvoli qoniqarli.

Shuningdek, Litvada ham koronavirus bilan kasallanishning birinchi holati aniqlangan. Maʼlumotlarga koʻra, u Italiyaning Verona shahrida 24-fevral kuni mamlakatga qaytib kelgan. Ayni vaqtida bemor izolyatsiya qilingan, ahvoli ogʻir emas.

Yangi Zelandiya ham birinchi bor yangi turdagi COVID-19 koronavirusi bilan kasallangan bemor aniqlangan. Bu haqda mamlakat bosh vaziri Jasinda Ardernning soʻzlariga tayanib, TVNZ telekanali xabar berdi.

Reuters maʼlumotiga koʻra, Afrikaning yana bir davlati — Nigeriyada ham koronavirusdan kasallanish boʻyicha birinchi holat qayd etilgan. Virus mamlakatga uch kun oldin kelgan Italiya fuqarosida aniqlangan.

28-fevral kuni COVID-19 koronavirus infeksiyasi tarqalgan davlatlar soni 52 taga yetdi.

Eslatib oʻtamiz, virusdan zararlanganlarning jami soni 83 ming kishiga yetgan, halok boʻlganlar soni 2858 kishini tashkil qilmoqda.