Foto: “Xalq soʻzi”

Xorazm viloyatida keyingi besh yilda bogʻdorchilik mahsulotlari eksporti hajmi 3,7 ming tonnadan 33 ming tonnaga oshdi. Bu sohada amalga oshirilayotgan yangi loyihalarni ishlab chiqarishga keng joriy etish, bogʻdorchilikda intensiv texnologiya va zamonaviy agrotexnologiyalardan samarali foydalanilganining amaliy natijasidir.

2017-yilda viloyatda 12311 gektar bogʻ mavjud boʻlgan boʻlsa, paxta maydonlarini qisqartirish evaziga 2022-yilga kelib bogʻ maydoni 15404 gektarga yetdi. Birgina Urganch tumanida keyingi 3 yilda Turkiya texnologiyasi asosida 700 gektar yangi bogʻlar tashkil qilindi.

— Oʻtgan yili tumanimizda 7 mln. 600 ming dollarlik meva eksport qilindi, — deydi Respublika qishloq xoʻjaligida xizmatlar koʻrsatish agentligining Urganch tumani loyiha ofisi rahbari Jasur Masharipov. — Ayni kunda fermer xoʻjaliklarida yetishtirilgan sarxil mevalar asosan qoʻshni davlatlarga eksport qilinmoqda. Hududda agrologistika tarmogʻining izchil rivojlanishi bu jarayonda bogʻbonlarga juda qoʻl kelmoqda. Bu yil meva eksporti hajmini 10 mln. dollarga yetkazishni moʻljallayapmiz.

Odilbek Odamboyev, “Xalq soʻzi”.