Turmush oʻrtogʻim Jumaboy Sanoqulov uch yil chet elda ishladi. Bilasiz, musofirlikning noni qattiq. Unga ham, oilamizdagilarga ham oson boʻlgani yoʻq.

Qishloqqa qaytdi-yu yurtimizdagi oʻzgarishlarni koʻrib, tadbirkorlik bilan shugʻullanishga ahd qildi. Devor toʻsinlari ishlab chiqarishga ixtisoslashgan oilaviy korxona tashkil etdi. Bizga “Oilaviy tadbirkorlik” dasturi doirasida 50 million soʻm miqdorida imtiyozli kredit ajratilgani ayni muddao boʻldi. Oʻnga yaqin ishchimiz bor. Aksariyati xorijda ishlab qaytgan yigitlar. Barchasi durustgina maosh olmoqda. Endi migrantlik davridagi qiyinchiliklar ularga butkul yot. Oʻzim ham qarab turganim yoʻq. Maxsus texnologiya asosida simlarni toʻqish bilan shugʻullanaman. Bu toʻsinlarning mustahkamligini taʼminlaydi.

Shukr, oilamiz oʻziga tinch. Turmushimiz yaxshi tomonga oʻzgardi. Farzandlarimizning ertasidan koʻnglimiz toʻq. Yaratganga shukr aytaman. Axir, yaqin-yaqingacha roʻzgʻor tebrataman, deb oʻzga yurtlarda sarson-sargardon boʻlgan, ne-ne qiyinchiliklarni boshidan kechirgan turmush oʻrtogʻim bugun – tadbirkor.

Oilaviy korxonamiz faoliyatini kengaytirish, yangi ish oʻrinlari yaratish niyatidamiz. Yangi 2026-yilni ana shunday ezgu niyatlar bilan qarshi olyapmiz.

Gulmira VOHIDOVA,

Shofirkon tumani.