Illyustrativ foto

Saminjon Husanov, “Xalq soʻzi”/Andijon. Marhamat tumani tibbiyot birlashmasiga qarashli diagnostika boʻlimi hamshirasi Baxtiniso Abloqulovaning noqonuniy xatti-harakatlari yuzasidan sud hukmi eʼlon qilindi.

Maʼlum boʻlishicha, u tanishi orqali fuqaroni ishga joylashtirib qoʻyish evaziga 300 AQSH dollarini olayotgan paytda qoʻlga olindi. Hamshirani nooʻrin xatti-harakatidan boshqa hamkasblari ham xulosa chiqarishlari uchun sud majlisi aynan tibbiyot birlashmasining oʻzida boʻlib oʻtdi. Vaholanki, Andijon viloyatida hamshiralar tomonidan tamagirlik qilish, oʻzgalar ishonchini qozonish orqali mol-mulkini oʻzlashtirish kabi holatlar birinchi marta sodir etilayotgani yoʻq.

Qilmish-qidirmish, deydilar. Sud hukmiga binoan Baxtiniso Abloqulova oʻzganing ishonchini suiisteʼmol qilib, mulkiy naf koʻrish niyatida boʻlganlikdaayblandi. Endi u 1 yil muddatga moddiy manfaatdorligi bor vazifalarda ishlash huquqidan mahrum qilinib, oylik ish haqining 15 foizini davlat daromadiga ushlab qolish sharti bilan 1 yil 6 oy muddatga ahloq tuzatish ishlari jazosiga mahkum etildi.