Foto: Saminjon Husanov / Xalq soʻzi

Andijon viloyatining Xonobod shahrida yaxshi anʼanaga qoʻl urildi. Aniqrogʻi, yosh rassomlar oʻz ijodini koʻcha devorlarida ifoda eta boshladilar. Xoʻsh, bundan maqsad nima?

– Eng sara asarlaringizni galereya yoki koʻrgazmalar zalida jam etib, namoyish etsangiz, sanoqli kishilar ulardan bahra olishi mumkin,-deydi rassom Bekzod Mirzayev. – Endi esa shu koʻchadan oʻtgan har bir yoʻlovchi biz chizgan suratlarni tomosha qilmoqda. Shaxsan men rassom sifatida ijod namunalarimni barchaga koʻrsata olayotganimdan xursandman. Qolaversa, bunday tasvirlar toki oʻchib ketmagunicha turaveradi. Tekin va muddatsiz koʻrgazma! Bunaqasi boʻlgan emas!

Quvonarlisi shundaki, ijod turiga bunday yondashuv xonobodliklarni ham mamnun etmoqda.

– Toʻgʻrisini aytsam, bu devorlarda “M+C” kabi yozuvlarni oʻqigandan koʻra shunday asarlarni tomosha qilish maroqli, - deydi ulardan biri Dilafroʻz Omonova.

Devorlarda asosan bebosh yoshlar chizib ketgan boʻlmagʻur “bitik”laru axloqsiz tasvirlardan charchagan nigohlar endi chindan ham zavq olmoqda.

Saminjon HUSANOV, “Xalq soʻzi”.