Yoz fasli mirishkor-u sohibkorlar uchun tigʻiz payt hisoblanadi. Boisi ular tomonidan parvarish qilingan meva-sabzavot va poliz mahsulotlari birin-ketin pishib yetiladi. Elimiz dasturxoni toʻkinligini taʼminlaydi.

Andijon viloyatida salkam 3 mingta fermer xoʻjaliklari aʼzolari qariyb 100 ming gektar maydonda samarali mehnat qilyapti. Hosilning choʻgʻi ham shunga yarasha, albatta. Mahsulotlar, eng avvalo, ichki ehtiyojga yoʻnaltirilmoqda. Mahalliy bozorlarda tashkil etilgan “Daladan dasturxongacha” savdo rastalari sarxil noz-neʼmatlar bilan toʻlgan.

— Yoz faslida bu kabi mahsulotlar sifatiga tez putur yetadi, — deydi xaridor Rustamjon Abdurasulov. — Shu bois toʻgʻri daladan keltirilgan meva va sabzavotlarni maxsus savdo rastalaridan xarid qilish oʻrinli, deb bilaman. Qolaversa, narxlari ham bozordagiga nisbatan 25-30 foiz arzon.

“Daladan dasturxongacha” savdo rastalari orqali har kuni 30 dan ortiq turdagi 500 tonnagacha mahsulotlar yetkazib berilib, 10 ming nafardan ziyod xaridorlarga sifatli xizmat koʻrsatilmoqda.

Saminjon HUSANOV

“Xalq soʻzi”