Bugun, 22-dekabr kuni Turkiya Superligasining 17-tur uchrashuvlari start oldi. Kun doirasidagi bahsda Istanbul Bashakshehir oʻz maydonida Gaziantep jamoasini qabul qildi. Uchrashuv mezbonlarning 5:1 hisobidagi ishonchli gʻalabasi bilan yakunlandi.

Bahsda hisob 21-daqiqada Eldor Shomurodov tomonidan ochildi. Oradan besh daqiqa oʻtib, Drissa Kamara hisobni tenglashtirdi. 29-daqiqada esa Abbosbek Fayzullayev aniq zarba bilan “Bashakshehir”ni yana oldinga olib chiqdi — 2:1.

Qayd etish joiz, soʻnggi paytlarda Fayzullayevning oʻyini turk futbol jamoatchiligi orasida turli tanqidlarga sabab boʻlayotgan edi. Oʻzbekiston milliy terma jamoasi aʼzosi ushbu goli orqali maydonda tanqidlarga munosib javob qaytardi. Birinchi boʻlim aynan shu hisobda yakunlandi.

Ikkinchi taymning 53-daqiqasida Arda Qizildagʻ oʻz darvozasiga toʻp kiritib qoʻydi va hisob 3:1 koʻrinishiga keldi. 68-daqiqada Eldor Shomurodovning aniq uzatmasidan keyin Umut Gunesh “Bashakshehir”ning toʻrtinchi golini muallifi boʻldi. 84-daqiqada esa Ivan Brnich mezbonlarning beshinchi golini kiritib, uchrashuvga yakun yasadi — 5:1.

Uchrashuvdan soʻng “Sofascore” tahliliy portali Eldor Shomurodovning oʻyinini 7,9 ballga, Abbosbek Fayzullayevning harakatlarini esa 9,3 ballga baholadi. Bu koʻrsatkichlar oʻzbekistonlik futbolchilarning maydondagi samarali oʻyinini yaqqol tasdiqladi.