Mahallaga yig`lab kelgan ayolni ovutish ancha qiyin bo`ldi. Erining gapi jonidan o`tib ketibdi. “Ajrashaman, gap tamom, ikki bolamni o`zim boqib olaman” deydi qizchasini bag`riga bosib. Hayoti o`xshamabdi. Etti yil yashabdi hamki, janjalsiz o`tgan kunning o`zi bo`lmabdi. Ayol bir gapdan qolmabdi, “dadasi, siz haqsiz” demabdi. Nuqul erining jahlini chiqarar ekan. 

Bu oilani murosaga keltirish uchun ayolning qulog`iga shu gaplarni aytdik:  Ayolning so`zi shirin bo`lsa muhitning ruhi o`zgaradi. Oiladagi bolalar muloyimlik va madaniyatga o`rganadi, keksalar hurmat topadi, erkak kishida mas’uliyat hissi yuksaladi. 

Ayolning bittagina iliq gapi oiladagi muammoni yumshatib, bolaga ruhiy madad beradi, turmush o`rtog`iga ishonch va kuch bag`ishlaydi. Hayot tajribasi shuni ko`rsatadiki, ko`plab nizolar do`q-po`pisa bilan emas, bir muloyim so`z bilan hal bo`ladi. Bu — ayolning eng go`zal fazilati, Yaratgan tomonidan berilgan ma’naviy quvvatdir.

Oilaning barqarorligi va yuraklarning tinchligi ko`p jihatdan ayol zotining qalbi va so`ziga bog`liq. Shu bois xalqimiz azaldan ayolni nafaqat oila ustuni, balki ma’naviy muhitni yaxshilab turuvchi asosiy kuch sifatida e’tirof etadi. Shu jihatdan ayolning shirin so`zi, muloyim muomalasi va iltifotli munosabati og`ir munosabat va muhitga ijobiy ta’sir ko`rsata oladi.

Madaniyatli va shirin so`zli ayol oilasiga hamda butun jamiyatning yuzi. Uning qalbidan chiqqan muloyim bir gap ko`plab qalblarga iliqlik ulashadi, ko`ngillardagi g`uborni tarqatadi, adovatni yumshatadi. Bugungi kunda oilada va jamiyatda ijobiy muhit yaratishni istagan har bir kishi avvalo so`z madaniyatiga, ayniqsa, ayollarning muloyim muomalasiga alohida e’tibor qaratishi zarur. Zotan, ayol so`zining shirinligi va ta’siri uning qalb tozaligi va niyat pokligidan kelib chiqadi.
  
Shohsanam RAHIMOVA,
Toshkent shahar, Olmazor tumani Yangi Sebzor mahalla fuqarolar yig`ini ayollar faoli.