2020-yil 11-noyabr kuni Oliy Majlis Qonunchilik palatasining navbatdagi majlisi boʻlib oʻtdi.

Unda xalq vakillari Oʻzbekiston Respublikasi Ekologiya va atrof muhitni muhofaza qilish davlat qoʻmitasi raisi lavozimiga Alisher Maqsudov nomzodini koʻrib chiqdilar.

Majlisda Ekologiya va atrof muhitni muhofaza qilish davlat qoʻmitasi raisi lavozimiga nomzodi koʻrsatilgan Alisher Maqsudov lavozimga kirishganidan soʻng ekologiya sohasidagi islohotlarning samaradorligini taʼminlash maqsadida kelgusida amalga oshiriladigan ishlar haqida qisqacha axborot berdi. Deputatlar tomonidan koʻtarilgan savollarga atroflicha javob qaytardi. Nomzod mazkur lavozimga kirishganidan soʻng ekologiya va atrof muhitni muhofaza qilishga oid barcha ishlarni parlament bilan yaqin hamkorlikda olib borishini aytib oʻtdi.

Savol-javob, muhokamalardan soʻng majlis yakunida Oliy Majlis Qonunchilik palatasining Alisher Maqsudov nomzodini Oʻzbekiston Respublikasi Ekologiya va atrof muhitni muhofaza qilish davlat qoʻmitasi raisi lavozimiga maʼqullash haqidagi qarori qabul qilindi.