Vazirlar Mahkamasi qarori bilan Hukumatning ayrim qarorlariga oʻzgartirish va qoʻshimchalar kiritildi, shuningdek, baʼzilari oʻz kuchini yoʻqotgan deb hisoblandi. Bu haqida “Huquqiy axborot” Telegram-kanali xabar berdi.

Unda aytilishicha, Hukumatning 2021-yil 7-yanvardagi 1-son qaroriga kiritilgan qoʻshimchalarga koʻra, “Davlat soliq xizmati organlari tomonidan soliq toʻlovchilar faoliyatida amalga oshiriladigan soliq nazorati tadbirini videotasvirga olish tartibi toʻgʻrisida”gi nizom tasdiqlangan.

Mazkur nizomga koʻra, nazorat tadbirlari soliq organi rahbari yoki rahbar oʻrinbosarining soliq tekshiruvini oʻtkazish toʻgʻrisidagi buyrugʻi asosida videotasvirga olinadi.

Soliq organi tomonidan oʻtkaziladigan nazorat tadbirlarida quyidagilar videotasvirga olinishi belgilangan:

• soliq solish obyektlarini hisobga olish;
• xronometrajni koʻzdan kechirish;
• soliq toʻlovchi ishchi va xodimlarining haqiqiy soni hamda soliq hisobotidagi aks ettirilgan ishchi va xodimlar soniga muvofiqligini tekshirish;
• nazorat kassa texnikasi va hisob-kitob terminallarini qoʻllash;
• savdo va xizmat koʻrsatish qoidalariga rioya etilishi va boshqalar.

Shuningdek, nazorat tadbiri soliq toʻlovchilarning qonuniy faoliyatini toʻxtatib qoʻymaydigan va faoliyat koʻrsatishiga ziyon yetkazmaydigan tarzda videotasvirga olinishi lozim boʻladi.

Bundan tashqari, nazorat tadbiri natijasi boʻyicha tuzilgan dalolatnomada tadbir jarayonini videotasvirga olish moslamasi (qurilmaning rusumi va seriya raqami), videotasvirga olingan holatlar toʻgʻrisidagi maʼlumotlar aks ettiriladi.