Toshkentda AQSHga ishga yuborish bilan bogʻliq firibgarlik holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Sergeli tumani boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan. Unda fuqaro Sh.A. goʻyoki yuqori lavozimlarda ishlovchi tanishlari orqali fuqaro M.O.ga AQSHga borishi uchun biznes viza rasmiylashtirib berishi evaziga 75 ming dollar olgan vaqtida ashyoviy dalillar bilan ushlangan.

Departamentning Xatirchi tuman boʻlimi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda esa “T.L.” MCHJ rahbari F.Sh. fuqaro J.B.ning ishonchiga kirib, uni Bolgariyaga yuborishi va ishga joylashtirib qoʻyishi evaziga firibgarlik yoʻli bilan 3 ming dollar olgan vaqtida ashyoviy dalillar bilan ushlangan.

Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.