Taʼqiqlangan dori vositalarini tekshiruvchi bot ishga tushdi. Bu haqida Oliy taʼlim, fan va innovatsiyalar vazirligi maʼlumot berdi.

Bildirilishicha, Ichki ishlar vazirligi Malaka oshirish instituti mutaxassislari tomonidan psixotrop va noqonuniy dori vositalarining tarqalishini oldini olish, shuningdek, aholining bu boradagi xabardorligini oshirish maqsadida “Psixotrop_moi_bot” ishlab chiqilib, amaliyotga joriy etilgan.

Ushbu bot qanday ishlaydi?

Foydalanuvchi botga maʼlum bir dori vositasi haqidagi maʼlumotni yuboradi. Tizim esa:

• Oʻzbekiston hududida taʼqiqlangan yoki taʼqiqlanmagani;
• psixotrop taʼsirga egaligi;
• inson salomatligiga taʼsiri;
• qonunchilikdagi maqomi va boshqalar haqida aniq maʼlumot beradi.

“Bugungi kunda ayrim dorilar yoshlar orasida notoʻgʻri maqsadda isteʼmol qilinmoqda. Koʻpchilik ularning aslida qanday taʼsirga ega ekanini bilmaydi. Mazkur bot aynan shunday muammolarning oldini olishga xizmat qiladi”, — deyiladi xabarda.

Talabalar uchun foydali:

• Tengdoshlari orasida shubhali holatlarni aniqlash;
• Doʻstlari, oila aʼzolari yoki tanishlari tomonidan isteʼmol qilinayotgan vositalarni tekshirish;
• oʻz salomatligini himoya qilish imkonini beradi.