Yaqin Sharqning qator davlatlari havo hududidan foydalanishga cheklovlar kiritilganligi munosabati bilan parvozlar jadvalidagi oʻzgarishlar kiritildi. Bu haqida “Uzbekistan Airways” aviakompaniyasi xabar berdi.

Bildirilishicha, 28-fevraldagi HY334 Dubay – Toshkent reysi havo hududi ochilib, Dubay xalqaro aeroporti oʻz ishini tiklaganidan soʻng amalga oshiriladi. Parvozni kutish vaqtida yoʻlovchilar mehmonxonaga joylashtirilgan va ularga barcha zarur xizmatlar koʻrsatilmoqda. Aviakompaniya aviatsiya rasmiylari va aeroport maʼmuriyati bilan doimiy hamkorlikda ish olib borayotganini taʼkidladi.

Shuningdek, 1-mart sanasidagi HY333/334 Toshkent – Dubay – Toshkent reyslari ham BAA havo hududi yopilganligi sababli majburiy ravishda bekor qilingan. Shu kungi HY337/338 Toshkent – Jidda – Toshkent reyslari ham yoʻlovchilar va ekipaj aʼzolarining xavfsizligini taʼminlash maqsadida muqobil yoʻnalish boʻyicha amalga oshirilishi belgilangan. Yoʻnalish oʻzgarganligi sababli parvoz vaqti uzayadi.

Bundan tashqari, 2-mart kunidagi HY301/302 Toshkent – Tel-Aviv – Toshkent reyslari ham Isroil havo hududi yopilganligi sababli majburiy ravishda bekor qilingan. Mazkur bekor qilingan reyslar yoʻlovchilariga aviakompaniyaning istalgan keyingi reyslariga chiptalarni bepul qayta rasmiylashtirish taklif etilgan.

“Keltirilgan noqulayliklar uchun uzr soʻraymiz. Yoʻlovchilar va ekipaj aʼzolarining xavfsizligini taʼminlash «Uzbekistan Airways” uchun eng oliy ustuvor vazifa boʻlib qoladi», — deyiladi aviakompaniya bayonotida.