Namangan viloyatida elektr energiyasidan noqonuniy foydalanish holatlari fosh etildi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Namangan viloyati boshqarmasi tomonidan tergovga qadar tekshiruv oʻtkazilgan.

Unda muqaddam sudlangan fuqaro B.X. Namangan shahar, “Gulbogʻ” MFY hududidagi xonadonida umumiy foydalanishdagi elektr tarmogʻiga oʻzboshimchalik bilan toʻgʻridan-toʻgʻri ulanib, 404,4 million soʻmlik elektr energiyasidan noqonuniy foydalanganligi fosh qilingan.

Shu kabi yana bir holat, Departamentning Namangan viloyati boshqarmasi tomonidan oʻtkazilgan tergovga qadar tekshiruvda ham aniqlangan.

Maʼlum boʻlishicha, muqaddam sudlangan fuqaro A.A. Namangan shahar, “Uchqun” MFY hududidagi xonadonida elektr hisoblagichga tashqi taʼsir koʻrsatib, 117 million soʻmlik elektr energiyasidan noqonuniy foydalanganligi aniqlangan.

Bundan tashqari, Departamentning Namangan viloyati boshqarmasi tomonidan oʻtkazilgan tergovga qadar tekshiruvda fuqaro A.A. Namangan shahar, “Uchqun” MFY hududidagi xonadonida elektr hisoblagichga tashqi taʼsir koʻrsatib, 144 million soʻmlik elektr energiyasidan noqonuniy foydalanganligi maʼlum boʻlgan.

Hozirda mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qoʻzgʻatilib, tergov harakatlari oʻtkazilmoqda.