Ommaviy axborot vositalari va internet tarmoqlarida joylashtirilgan materiallarning “Reklama toʻgʻrisida”gi Qonun talablariga mosligi yuzasidan oʻrganish va tahlil ishlari olib borildi, deb xabar bermoqda Raqobat qoʻmitasi.

Unda aytilishicha, turoperatorlar tomonidan Umra tadbirini tashkil etish va oʻtkazishga oid berilgan reklamalar oʻrganilganda qator qonunbuzilish holatlari aniqlangan.

Jumladan, Surxondaryo va Fargʻona viloyatlari hududiy boshqarmasi tomonidan “Sharofiddin Travel” va “Fayz Tour Travel” MCHJlarning turoperatorlariga nisbatan litsenziya hujjatlari mavjud boʻlmagan holda reklamalar joylashtirgani va bu bilan “Reklama toʻgʻrisida”gi Qonun talablarini buzgani yuzasidan belgilangan tartibda ish qoʻzgʻatilib, yakunlari boʻyicha moliyaviy jarimalar qoʻllanilgan.

Shuningdek, qoʻmitaning Qoraqalpogʻiston Respublikasi, Samarqand, Surxondaryo, Namangan, Fargʻona, Xorazm viloyati va Toshkent shahar hududiy boshqarmalari tomonidan “Marmaristour.uz”, “rozumbetovjurabek”, “uzmobile_aviakassa”, “Samarqanddan Umra ziyorati” Instagram sahifasi, “Umra Ziyorati”, “Fazliddin Umra jamiyati”, “Muborak safar”, “Qoʻqimboyliklar”, “Saudiyaga sayohat”, “Umra rasmiy”, “Aviakassa721”, “Nursafar” Telegram kanallari maʼmurlari tomonidan berilgan reklamalarda ham yuqoridagi kabi qonunchilik talablari buzilishi yuzasidan mansabdor shaxslari maʼmuriy javobgarlikka tortilgan.

“Ushbu oʻrganish yakunlari yuzasidan qonunchilikda belgilangan tartibda tegishli choralar koʻrilishi taʼminlanadi”, — deyiladi qoʻmita xabarida.