Foto: Prezident matbuot xizmati

Prezident Shavkat Mirziyoyev raisligida oʻtayotgan Toshkent shahrida xavfsiz muhitni shakllantirish hamda jamoat xavfsizligini samarali taʼminlash boʻyicha namunaviy amaliyotni yaratish chora-tadbirlari yuzasidan videoselektor yigʻilishida huquq-tartibot tizimi poytaxtdagi yangiliklarga mos ishlamayotgani tanqid qilindi.

Poytaxtning huquq-tartibot idoralari rahbarlari – prokuror vazifasini bajaruvchi A.Oʻrmonov, ichki ishlar (Sultonxoʻjayev), departament (birinchi oʻrinbosar Kenjayev), xavfsizlik (Berliboyev), gvardiya (Ortiqov), sud (Ismoilov), adliya (birinchi oʻrinbosar Nazarov), bojxona (Saidov), soliq rahbari (Nasimjonov) respublikaga namuna boʻlmayapti. Buning uchun poytaxtda resurs ham, kuch-vositalar ham, ilmiy salohiyat ham yetarli boʻlishiga qaramasdan, haligacha eski “qolip”dan chiqib keta olmayotgani aytib oʻtildi.

Bu yil “Mahallani rivojlantirish va jamiyatni yuksaltirish yili”, deb nomlandi. Har qanday huquqbuzarlikning oldini olishda asosiy boʻgʻin – mahalla profilaktikasi. Lekin Toshkent shahridagi profilaktika xizmatlarining ishi toʻgʻri tashkil etilmagani uchun muammolar toʻplanib qolgani qayd etildi.

Ichki ishlar boshliqlari profilaktika inspektorlarini ertalab soat yettida va kechqurun oʻnda yigʻib, soatlab yigʻin oʻtkazadi. Ular huquqbuzarlik bilan ishlash oʻrniga kommunal qarzdorlik va aliment undirish, armiyaga yuborish va boshqa jamoat ishlariga ham jalb qilinyapti.

“Oqibatda ularni mahalladan topib boʻlmaydi. Bir nechta mahallaga oʻzim odam yubordim. Koʻpi ish joyida yoʻq yoki boshqa ishni qilib yuribdi”, dedi Prezidentimiz.