Videodan kadr

Toshkent shahar Sergeli tumanida 37 yoshli haydovchi ikkita avtobus oʻrtasida qolib ketishi oqibatida halok boʻldi. Bu haqda “Toshshahartransxizmat” AJ xabar berdi.

Qayd etilishicha, kecha, 20-dekabr kuni taxminan soat 16:56 larda “1-avtobus saroyi” filiali tasarrufida boʻlgan “Yutong CNG” rusumli, 55-yoʻnalishda harakatlanadigan avtobus haydovchisi 55 yoshli I.A. (mehnat faoliyati 35-yil, korxonada 1,5 boʻlgan) avtobusni Sergeli tumani Xonobod koʻchasi boʻylab boshqarib kelib, temiryoʻl kesishmasida poyezd oʻtayotgani sababli toʻxtatib turgan.

Shu vaqtda uning orqasida toʻxtab turgan “12-avtobus saroyi” filialiga tegishli “Yutong CNG” rusumli, saroy raqami 126-boʻlgan avtobus haydovchisi 37 yoshli E.R. (mehnat faoliyati 17-yil, korxonada 1-yil) avtobusni qoʻl tormoziga qoʻymasdan pastga tushib avtobus oldiga oʻtgan. Shundan soʻng, avtobus oʻz inersiyasi bilan yurib ketib, haydovchi E.R.ni siqib qoʻygan. Oqibatda baxtsiz hodisa sodir boʻlgan.

Aniqlanishicha, mazkur baxtsiz hodisa “12-avtobus saroyi” filiali haydovchisining ehtiyotsizligi oqibatida sodir boʻlgan va haydovchi E.R. voqea joyida vafot etgan. Hozirda ushbu hodisa Toshkent shahar Ichki ishlar bosh boshqarmasi tergov boʻlimi tomonidan rasmiylashtirilgan.