Bosh prokuratura huzuridagi Departamentning Fargʻona shahri boʻlimi xodimlari tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida “V.A.” MCHJ savdo doʻkoni sotuvchisi fuqaro O.S. xaridorga 2 dona qalbaki aksiz markali alkogol mahsulotini sotgan vaqtida ushlanib, ushbu savdo doʻkonidan turli nomdagi umumiy bahosi 106,7 million soʻmlik qalbki alkogol hamda 10,5 million soʻmlik tamaki mahsulotlari ashyoviy dalil sifatida rasmiylashtirib olingan.

Shu kabi yana bir holat, departamentning Shahrisabz shahri boʻlimi va IIB xodimlari hamkorligida oʻtkazilgan tezkor tadbirda ham aniqlangan.

Unga koʻra, “Boʻston” MFY hududidagi “D.D.” xususiy korxonasiga qarashli savdo doʻkonida umumiy bahosi 34,5 million soʻmlik 18 turdagi 938 dona qalbaki aksiz markali alkogol mahsulotlari sotuvga qoʻyilganligi aniqlanib, ushbu alkogol mahsulotlari ashyoviy dalil sifatida olingan.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari boshlab yuborilgan.