Sankt-Peterburgda (Rossiya) 2026-yilda mehnat migrantlari uchun patent narxi 6 ming rubldan 8 ming rublgacha koʻtariladi. Bu haqda TASS shahar parlamenti matbuot xizmatidan olingan maʼlumotga tayanib xabar bermoqda.

Maʼlum qilinishicha, Peterburg parlamentining byudjet va moliya qoʻmitasi shahar gubernatori taklif qilgan, mehnat bozorining mintaqaviy xususiyatlarini inobatga oluvchi koeffitsiyentni 2,3457659 ga oshirish haqidagi qonun loyihasini qoʻllab-quvvatladi.

“Bu koeffitsiyent patent — yaʼni mehnat migrantlari uchun belgilanadigan oldindan toʻlanadigan qatʼiy toʻlov miqdorini Rossiyaning har bir hududi sharoitidan kelib chiqib tartibga solish imkonini beradi”, — deyiladi xabarda.

Loyiha mualliflarining taʼkidlashicha, taklif etilayotgan oʻzgarishlar Peterburg byudjetiga kamida 11 milliard rubl tushirish imkonini beradi. Shu bilan birga, Leningrad viloyati ham xorijlik ishchi migrantlar uchun patent narxini 8 ming rublga yetkazishni rejalashtirmoqda.

Eslatib oʻtish joiz, Sankt-Peterburgda patent narxi 2018-yildan beri shaharning umumiy maosh darajasiga mutanosib ravishda bosqichma-bosqich oshirib kelinmoqda.