AQSh prezidenti Donald Tramp 2026-yilgi futbol boʻyicha Jahon chempionatiga keluvchi muxlislar uchun maxsus viza imtiyozlari joriy etilganini maʼlum qildi. Unga koʻra, FIFA orqali rasmiy ravishda chipta sotib olganlar AQSh elchixonalaridagi viza suhbatlari uchun ustuvor navbat oladi.

Bu tizim xorijiy futbol muxlislari orasidagi uzoq kutish vaqtlarini qisqartirishga xizmat qilishi koʻzda tutilgan. Ustuvor suhbatlar 2026-yil boshlaridan ochilishi kutilmoqda.

Trampning aytishicha, Davlat departamenti va Xavfsizlik departamenti chempionat davomida AQShga keladigan millionlab muxlislarni “tegishli tartibda tekshirish va qulay kirish imkonini yaratish” ustida ishlamoqda. JCh–2026 AQSh, Meksika va Kanada hamkorligida oʻtadi va har uchala mamlakatga katta iqtisodiy foyda keltirishi kutilmoqda.

FIFA prezidenti Janni Infantino ham Oq uydagi uchrashuvdan soʻng xavfsizlik chempionat muvaffaqiyati uchun eng asosiy omil ekanini taʼkidladi. Tramp boshchiligidagi Oq uy maxsus ishchi guruhi turnirning logistika va xavfsizlik ishlarini muvofiqlashtirish bilan shugʻullanadi.