Bosh prokuratura huzuridagi Departamentning Chilonzor tumani boʻlimi xodimlari tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida “B.P.” MCHJ dorixonasi sotuvchisi N.N. tarkibida kuchli taʼsir qiluvchi moddalari mavjud boʻlgan 10 quti “Omnadren 250” nomli dori vositasini fuqaro M.Q.ga 2,8 million soʻmga shifokor retseptisiz sotgan vaqtida ashyoviy dalillar bilan qoʻlga olingan.

Shu kabi yana bir holat, departamentning Toshkent shahar boshqarmasi xodimlari tomonidan Yunusobod tumanida oʻtkazilgan tezkor tadbirda ham aniqlangan.

Unga koʻra, “Ch.P.” MCHJ dorixonasi sotuvchisi Yu.A. tarkibida kuchli taʼsir qiluvchi moddalari mavjud boʻlgan 500 dona “Benzonal” nomli dori vositasini shifokor retseptisiz sotgani oshkor boʻlgan.

Hozirda mazkur holatlar yuzasidan Jinoyat kodeksining 186-3-moddasi (tarkibida kuchli taʼsir qiluvchi moddalar mavjud boʻlgan dori vositalarini retsept boʻyicha chakana realizatsiya qilish tartibini buzish) bilan jinoyat ishi qoʻzgʻatilib, tergov harakatlari boshlab yuborilgan.