Ўзбек миллий электромобили яратилди (фото)

14:58 28 Февраль 2019 Жамият
2435 0

Фарғона давлат политехника институтида таҳсил олиб, айни дамда Бухорода истиқомат қилаётган 27 ёшли Саидбек Ғуломов ўзбекона миллий электромобил ихтиро қилди. Бундай дейишимизнинг сабабларидан бири шундаки, Саидбек автомашина дизайнини яратишда Фарғона дўпписи шаклларидан фойдаланган.

— Енгил автомашина яратиш ғояси менда 2017 йилда туғилган эди, — дейди у. — Изланиш, ўрганиш ортидан сиз кўриб турган машина модели юзага келди. Унинг узунлиги 4 метр 75 сантиметрни, эни 2 метрни, баландлиги эса 1,53 метрни ташкил этади. Баландлиги “Кобольт” русумли машина билан деярли тенг.

Электромобилнинг кузови юз фоиз алюминийдан тайёрланди. Чунки бу материал енгил. У машинанинг юриш давомийлигини оширишга хизмат қилади. Автоуловнинг афзалликларидан бири ёқилғи сарфининг тежамкорлигида. Негаки, у электр токи воситасида юради. Бензин ва газ тежалади. 6,5 секундда 100 километр соат тезликка эришади. Қиёслаш ўрнида айтиш жоизки, “Малибу-2”да бу кўрсатгич 7,8 секундни ташкил этади. Нархи эса нисбатан арзон. Хомаки ҳисоб–китобларга кўра, 110–150 миллион сўм. Яна бир қулайлиги, у харидор хоҳиш–истагига кўра, индивидуал буюртма асосида ишлаб ишлаб чиқарилади.

— Бу моделни яратишда итальян, немис, инглиз, япон автомобилларининг барча устун жиҳатларини уйғунлаштиришга ҳаракат қилдим, — дейди ёш ихтирочи. — Унинг ягона камчилиги бу қайта зарядлаш вақтининг узоқ давом этишидир. Аммо ҳозир дунёнинг ривожланган давлатларида қаттиқ жинсли аккумуляторлар синовдан ўтказиляпти. Бу эса муаммонинг ечими борлигидан дарак беради. Электромобил бўйича патентга эга бўлиш учун республика Интеллектуал мулк агентлигига зарур ҳужжатларни топшириб, дастлабки хулосаларни олдик.

Айтмоқчи, бизда 14 кишилик жамоа шаклланган. Барчаси иқтидорли, изланувчан. Агар қобилиятли ёшлар бўлса, уларни ўз сафимизга қўшишга тайёрмиз.

Автоуловнинг моделини яратиш, инновацион ғояларни амалда татбиқ этишда ёш ихтирочига вилоят ҳокими ёрдам қўлини чўзди. Когон тумани ҳудудида фаолият кўрсатаётган масъулияти чекланган жамият шаклидаги “Когонремстройкомлект” Ўзбекистон –Россия қўшма корхонаси ҳомийлик қилмоқда.

Истам ИБРОҲИМОВ, “Халқ сўзи”.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар

Afisha

Президент топшириқлари қандай бажарилмоқда? Мутасаддилар жавоб берадилар

Ёдингизда бўлса, Президентимиз жорий йил 11 январь куни халқ депутатлари Самарқанд вилояти Кенгашининг навбатдан ташқари сессиясида туман ва шаҳар фаоллари мурожаатларини тинглар экан, улар кўтарган муаммоли масалаларни қисқа муддатда ҳал этиш юзасидан мутасаддиларга тегишли топшириқ ва кўрсатмалар берган эди.

05 Февраль 2019