Хитойнинг Hebei Good Hope Logistics Development Co. компанияси Ўзбекистонда юк ва йўловчи ташийдиган электромобиллар(пикаплар) ишлаб чиқаришни йўлга қўяди. Бу Вазирлар Маҳкамаси томонидан “Ўзбекистон Республикасининг Хитой Халқ Республикаси билан ҳамкорлик бўйича ҳукуматлараро қўмитанинг бешинчи мажлиси якунларига кўра эришилган келишувларни амалга ошириш чора-тадбирлари тўғрисида”ги қарорида белгилаб қўйилди.

Унда Ўзбекистон Республикаси Президентининг 2019 йил апрелдаги Хитой Халқ Республикасига ташрифи ва “Бир макон, бир йўл“ иккинчи халқаро форумда иштирок этиши, шунингдек, музокаралар якунида эришилган келишувлар Ўзбекистон Республикаси билан Хитой Халқ Республикаси ўртасидаги икки томонлама муносабатларнинг стратегик хусусиятини мустаҳкамлагани қайд этилган. Ушбу келишувларнинг умумий қиймати 4,3 трлн. долларга тенг. Лойиҳалар сони эса 54 та.

Hebei Good Hope Logistics Development Co. пикаплар ишлаб чиқаришдан ташқари, “Ангрен” ЭИЗ ҳудудида яна қатор лойиҳаларни амалга оширади.

Юқори сифатли архитектура ойналари(3-12 мм.), кейинчалик 50 фоизгача маҳаллийлаштириш билан велосипедлар, электр техника маҳсулотлари(двигателлар, насослар, электр таянчлари учун қурилиш асбоб-ускуналари), фотоэлектр модуллари шулар жумласидандир.

Бу борадаги биринчи лойиҳа 2021 январда ишга туширилади.