Mirzaobodda anordan tabiiy sharbat ishlab chiqaradigan korxona ish boshladi

12:35 24 Sentyabr 2018 Iqtisodiyot
1453 0

“XALQ SOʻZI ONLINE”. Ahmadali Shеrnazarov/Sirdaryo. Yevropa Ittifoqi tomonidan moliyalashtirilgan Germaniya Xalqaro hamkorlik jamiyati tomonidan amalga oshirilayotgan “Oʻzbekiston qishloq hududlarini barqaror rivojlantirish” loyihasi doirasida Mirzaobod tumanidagi “Dehqonobod asl anori” kooperativida “Tabiiy anor sharbati” ishlab chiqarish sexi tashkil etildi. Sexda bu yil 1000 tonna anorni qayta ishlash moʻljallanmoqda.

Foto: Ahmadali Shernazarov/“Xalq soʻzi online”

Avstriyadan keltirilgan mazkur liniyada oʻtgan yilgi hosildan sinov tariqasida tayyorlangan sharbat mutaxassislar tomonidan yuqori baholandi.

“Hozir viloyatimizdagi anor yetishtiruvchilar bilan shartnomalar tuzayapmiz. Ana shu kelishuvlarga binoan aholi tomorqalari hamda fermerlardan qabul qilinadigan anorni toʻligʻicha qayta ishlash harakatidamiz. Yaʼni yana ikkita sex ochish boʻyicha tuzgan rejamiz amalga oshsa, sharbat tayyorlash jarayonida hosil boʻladigan meva poʻchogʻi hamda danagini ham tayyor mahsulot holiga keltirish imkoniyati yaratiladi. Mazkur loyihani amalga oshirish doirasida Germaniyada va u yerda tashkil etilgan koʻrgazmada boʻldik. Va bizning yurt anorlarining har jihatda yuqori baholanganligini oʻz koʻzim bilan koʻrdim. Yana bir eʼtiborli jihat ushbu meva va uning sharbatining Yevropadagi narxi ancha balandligiga ha guvoh boʻldim. Yaʼni, sanoat asosida ishlab chiqarilgan 1 litr anor sharbati 49 yevro ekan. Bizda esa 15 ming soʻm atrofida“, - deydi “Dehqonobod asl anori” ishlab chiqarish kooperativi rahbari Isroil Neʼmatov.

Foto: Ahmadali Shernazarov/“Xalq soʻzi online”

Maʼlumot uchun aytish lozimki, anor poʻsti dunyodagi eng qimmatbaho va noyob xom ashyolardan hisoblanib, undan farmatsevtika, lok-buyoq mahsulotlari ishlab chiqarish hamda chorva ozuqasi uchun komponent sifatida foydalaniladi. Danagidan olinadigan moy esa farmatsevtika va kosmetika sanoatida keng qoʻllaniladi.

Foto: Ahmadali Shernazarov/“Xalq soʻzi online”

Ayni chogʻda kooperativ aʼzolari Germaniya Xalqaro hamkorlik jamiyati bilan birgalikda 5 gektar yerda zamonaviy anorzor barpo etish harakatida. Yaqin kelgusida esa bogʻ maydonini 200 gektarga yetkazib, mazkur subyekt negizida anorchilik klasteri tashkil qilish kutilayotir.


Izohlar

Hozircha hech kim fikr bildirmagan. Balki Siz birinchilardan bo'larsiz?