Мажбурий ижро бюроси Нукус шаҳар бўлимининг тезкор шўъбаси томонидан “Туямуюн Нукус” Минтақалараро сув қувуридан фойдаланиш бошқармаси Нукус шаҳар Оқава сув филиалига қарашли 21 та канализация насос станцияларида ичимлик сувдан фойдаланиш ҳолати текширилди.
Ўтказилган текширишда 12 та объектларда ичимлик сувдан сув ҳисоблагич ускунаси ўрнатмасдан фойдаланаётганлиги ҳолатлари аниқланиб, белгиланган тартибда ҳуқуқбузарлик ва тармоқдан ажратиш далолатномалари расмийлаштирилган.
Аниқланган қоидабузарлик ҳолатлари юзасидан Нукус шаҳар Оқава сув филиали бошлиғи Аимбетов Азат Муслатдинович ўз тушунтиришларида текширишдан ўтказилган 5 та объектда СП ва 7 та объектда КНС русумли насос станциялари ўрнатилиб бўлиб, сувдан ушбу жойда ишловчи ходимлар ўз эҳтиёжлари учун фойдаланиб келганлиги сабабли сув ҳисоблагич ускуналари ўрнатилмаганлигини билдирган.

Қизиқ, текшириш ишлари ўтказилган канализация насос станциялари раҳбарлари ва ходимлари ўз фаолиятида амалдаги меъёрий ҳужжатлар талабларига итоъат қилган ҳолда ишлаши бурчи ҳамда мажбурияти эмасми?

Тегишли мутахассислар иштирокида қоидабузарлик аниқланган объектларга бориб давлат қиёсловидан ўтган манометр ёрдамида ичимлик сувнинг босимлари ўлчаниб, тегишли ҳужжатлар расмийлаштирилганда, текшириш ўтказилган 12 та объект бўйича жами 2 млрд. 155 млн. сўм миқдорида давлат манфаатларига жуда кўп миқдорда зарар етказилганлиги маълум бўлди. Ҳозирги вақтда юқоридаги ҳолатлар юзасидан суриштирув ишлари ўтказилиши давом эттирилиб, айбдорларнинг жавобгарлик масаласи ҳал этилмоқда.