Савол кўндаланг қўйилади: Ҳокимият “дахлсиз объект”ми?

09:59 02 Май 2019 Жамият
1360 0

[...] Аҳоли билан доимий мулоқот қилиш, унинг қонуний талаблари, сўров ва таклифларини амалга ошириш учун аниқ чоралар кўришни мен ўзим учун энг муҳим ва устувор вазифа, деб ҳисоблайман.

Шавкат Мирзиёев. (2016 йил 14 декабрь)

Бугун, галдаги иш режаларимга кўра, Пастдарғом туман ҳокимиятига бордим. Ҳокимликнинг муҳташам биносига кириш дарвозаси замонавий қулф билан ёпиб қўйилибди. Яхшиям, “Туман ҳокими қабулхонаси” деган кўрсаткич белгига кўзим тушиб қолди. (Бўлмаса роса хуноб бўларканман.) Чор-атрофи қарийб 4-5 метр келадиган панжаралар бўйлаб, махсус турникетли хонага яқинлашдим. Тўрт-беш аёл ҳамда ёш гўдакларнинг ғамгин нигоҳи эътиборимни тортди.

- Ҳа, опалар, нима муаммоларингиз бор дедим, атрофга кўз ташлаб. Жавоб бўлмагач, хонага кирдим. Икки нафар ички ишлар ходими турникет олдида йўлимни тўсди.

- Ҳужжатингиз. Нима масалада келдингиз?

- Мухбирман. Мен туман хокимлиги расмийлари билан учрашишим керак. Бир икки масалаларда саволларим бор.

- Айнан ким? Хоким бўлса, у киши йўқ!

- Мана ҳужжатим. Дафтарингизга қайд қилинг ва мени ичкарига киритинг!

- Ҳозир, бир мутахассис олдингизга тушади...

Ҳайрон қолдим, ҳатто вилоят ҳокимлиги биносига ҳам ҳужжатингизни кўрсатиб, бемалол кираверасиз...

Ташқаридаги аёлларга юзландим.

- Опалар, мен мухбирман. Балки, сизларга ёрдамим тегиб қолар.

- Бизнинг дардимиз оғир ака, дейди шу туманнинг Гўзалкент маҳалласидаги 4-уйда истиқомат қилувчи Зулхумор Чўлиева ва Шаҳло Шодиева.

– Туман ҳокими Шунқор Фармонович яшаётган уйимизни “аварийний” дея, бизни кўчага ҳайдаяпти. Имкони борлар чиқиб кетди. 20 та хўжалик яшайди. “Қаерда яшайлик” десак, “Билмайман, квартирада туринглар” деяпти. Биз мана бу гўдакларимиз билан зорланиб қаерга борамиз... Квартирага пулни қаердан топамиз. Ўзим касалман, турмуш ўртоғим Хуршид Бозоров ёлланма мардикорчилик билан шуғулланади, дея қўшимча қилади Зулхумор Чўлиева. Ўзи зўрға кун кечирсак...

...“Фуқаролар қабулхонаси”. Оққушдек бино. Ичкарида Мазмуна Маркаева исмли мутахассис.

– Сиз фуқаролар кириб-чиқишини назорат қиларкансиз, шундайми?

– Шундай, бу тартибни ҳокимимиз Шунқор Фармонович жорий қилган. Биз оддий ижрочимиз холос...

Мақола сарлавҳасини менга Пастдарғом туман ҳокимлиги ташкилий назорат гуруҳи раҳбари Обид Облақулов топиб берди. Нега дейсизми? Чунки, ҳокимият “режимный объект” экан. Саволга тутаман: - Кечирасизу биринчи марта эшитишим ҳокимият “режимный объект” эканлигини?

- Шунақа ака, истаган одам кириб чиқаверадиган жой эмас, бу идора.

– Масалан, кеча бири “махсус” идораданман дея, ҳужжат кўрсатиб кириб кетибди. Кейин аниқласак, бу одам, бу “жой”да ишламас экан...

Қотиб қолдим. Икки кўзим, тинмай гоҳ тоғдан, гоҳ боғдан келаётган туман ҳокимининг ташкилий назорат бўлими раҳбарининг алақ-жалақ гапларида эди...

Савол туғилади: Туман хокими, тумандаги биринчи расмий шахс бўлса, қолаверса, биринчи сектор раҳбари. Бу ҳам етмагандек, ҳокимият биносини баланд панжаралар билан иҳоталаб олган бўлса? Одамлар кимга арзу додини айтсин? Мутасаддилар бу ҳолатга нима деркан?

Умид СОРИЕВ, ”Халқ сўзи”.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар

Afisha

Президент топшириқлари қандай бажарилмоқда? Мутасаддилар жавоб берадилар

Ёдингизда бўлса, Президентимиз жорий йил 11 январь куни халқ депутатлари Самарқанд вилояти Кенгашининг навбатдан ташқари сессиясида туман ва шаҳар фаоллари мурожаатларини тинглар экан, улар кўтарган муаммоли масалаларни қисқа муддатда ҳал этиш юзасидан мутасаддиларга тегишли топшириқ ва кўрсатмалар берган эди.

05 Февраль 2019