Кеча, 15 декабрь куни Ёшлар ижод саройида «Ўзбекистон маданий бойлиги янги Ренессанс пойдевори» IV Халқаро конгресси ўз ишини бошлади. Унда бир қатор вазирлик ва идоралар раҳбарлари, халқаро ташкилотлар вакиллари, дунёнинг 40 дан ортиқ мамлакатларидан 300 дан ортиқ таниқли маҳаллий ва хорижий олимлар қатнашмоқда.

Конгресс Ўзбекистон маданий меросини сақлаш, ўрганиш ва оммалаштириш Бутунжаҳон жамияти томонидан ташкил этилди.

Тадбирда Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев кириш сўзи билан иштирок этиб, мамлакатимизда сўнгги йилларда амалга оширилаётган ислоҳотларга урғу берди.

Хусусан, жамиятда янги муҳит яратилгани, оммавий ахборот воситалари ҳамда фуқаролик жамияти фаоллашаётгани, энг муҳими, одамларда дахлдорлик ҳисси ва жамият тақдири учун масъулият ошаётганини таъкидлади.

Бундан ташқари, Ўзбекистоннинг ўз тарихий, цивилизацион ўрнини янгитдан тиклаш, ўзбек халқининг генетик инсоний потенциалига монанд тараққиёт даражасини таъминлаш, учинчи Ренессанс барқ уриш даври келганини қайд этиб, бу фақатгина шиор ёки умумий даъват эмаслиги, унинг аниқ йўналишлари, муайян дастурлари мавжудлиги, тарихга назар ташлаб илгариги Ренессанслар сабоқларидан хулоса чиқариб, ҳаракатларни замон талаблари, давр императивлари билан уйғунлаштириш лозимлиги тўғрисида сўз юритди.

Шунингдек, Ренессанс – инсон эҳтиёжлари, эркинликлари ва ҳуқуқларини таъминлашдан бошланиши эканлигига урғу бериб, учинчи Ренессанс узоқ истиқбол масаласи эмаслиги, у бугун, ушбу онда жамиятимиз, унинг ҳар бир ҳужрасида муттасил етилиб келаётган, реал воқелик эканлигини таъкидлади.

Конгресс доирасида бир қатор маданий тадбирлар ўтказилиши режалаштирилган.