Россия бозори учун таклиф қилинаётган уч турдаги Ravon автомобилларининг нархи сезиларли равишда оширилди. Бу ҳақда “Халқ сўзи Online“га Россиядаги дилерлик идораси вакили маълум қилди.

Унга кўра, GM Uzbekistan томонидан ишлаб чиқарилаётган Ravon бренди остидаги R2 ва Nexia седан автомобиллари 50 минг рублга (тахминан 790 доллар), Gentra эса 20 минг рублга ( тахминан 310 доллар) қимматлашган. Россия бозори учун таклиф этилаётган яна бир марка — R4 (Cobalt) олдинги нархида қолмоқда.

Эндиликда Россия бозорида Ravon R2 автомобилини камида 489 000 рубль (7,7 минг доллар)га сотиб олиш мумкин. Машинанинг барча комплекти ўрнатилган фулл версияси эса 559 000 рублни (8,8 минг доллар) ташкил қилмоқда.

Шунингдек, Россия бозорида Nexia седанини 499 000 — 599 000 рубль (7,9 минг — 9,5 минг доллар), R4 моделини 529 000 — 659 000 (8,4 минг— 10,4 минг), Gentra‘ни эса — 569 000 — 699 000 рубль (9 минг — 11 минг) эвазига сотиб олиш мумкин бўлади.

Эслатиб ўтамиз, июнь ойида Россия бозорида Ravon бренди остидаги автомобиллар бирорта ҳам сотилмагани ҳақида хабар берилганди.