Пенсияга чиқдингиз, қандай муаммо бор?

10:21 23 Апрель 2018 Сиёсат
3826 1

Бугунги кунда мамлакатимизда 3,3 миллион нафардан зиёд фуқаролар пенсия ва нафақа олади. 2017 йилда пенсия ва нафақа тўловлари учун жами 16,6 триллион сўмдан ортиқ маблағ молиялаштирилган бўлиб, бу Давлат бюджети жами харажатларининг ўртача учдан бир қисмини ташкил этади.

Давлатимиз раҳбарининг тегишли ҳужжатларига мувофиқ, ўтган йилнинг февраль ойидан барча турдаги пенсия ва нафақалар фақат нақд пул кўринишида, жорий йилдан бошлаб, “Халқ...”, “Хизмат кўрсатган ... арбоби” ва “Хизмат кўрсатган...” фахрий унвонларига эга ишлаётган пенсионерларга пенсиялар тўлиқ миқдорда тўланиши йўлга қўйилди. Бундан ташқари, 65 ёшга тўлган ва ундан катта ёшдаги фуқаролардан, шунингдек, 2010 йилгача бўлган даврда тайинланган пенсия ва нафақаларнинг ортиқча тўланган пули қолдиқ суммаларини ҳисобдан чиқариш тартиби жорий қилинди.

“Фуқароларнинг давлат пенсия таъминоти тўғрисида”ги Қонунга мувофиқ, пенсия тайинлаш учун фуқароларнинг энг кам иш стажи 5 йилдан 7 йилга узайтирилди, шунингдек, ногиронлик пенсиясига мурожаат этиш муддати 6 ойдан 60 кунгача қисқартирилди.

Олий Мажлис Қонунчилик палатасининг Меҳнат ва ижтимоий масалалар қўмитаси томонидан фуқароларнинг давлат пенсия таъминоти соҳасидаги қонунчиликни такомиллаштириш масалалари муҳокамасига бағишлаб ўтказилган давра суҳбатида шулар хусусида сўз юритилди. Депутатларнинг ҳудудлардаги ўрганишлари, аҳоли билан учрашув ва мулоқотларида фуқаролар томонидан пенсияга оид кўтарилган масалалар соҳа мутасаддилари, мутахассислари ва экспертлар иштирокида кенг муҳокама қилинди.

Қайд этилганидек, бугунги кунда бюджетдан ташқари Пенсия жамғармаси даромадларини шакллантириш механизмларини замонавий молиявий сиёсат концепциялари асосида такомиллаштириб бориш, жамғарма маблағларидан оқилона фойдаланиш мақсадга мувофиқ. Хусусан, Ўзбекистон Халқ демократик партияси фракцияси вакиллари юқорида қайд этилган Қонуннинг 37-моддаси, яъни иш стажига қўшиб ҳисобланадиган меҳнат фаолияти турларини кўриб чиқиш масаласини илгари сурди. 

Депутатлар ногиронлиги бўлган фарзандларни тарбиялаётган аёлларнинг иш стажига болага қараган йилларини қўшиш таклифини билдирди.
Шунингдек, парламент аъзолари меҳнат миграцияси билан боғлиқ муаммолар, чунончи, хорижда ишлаётган фуқароларнинг пенсия ёшига етганда тегишли ҳужжатларни расмийлаштиришдаги номувофиқликлар, бу бўйича юртимизда аниқ механизм мавжуд эмаслигига эътибор қаратди. Бунинг учун депутатлар фуқароларнинг пенсияга оид ҳуқуқларини амалга ошириш мақсадида ушбу йўналишда ҳукуматлараро келишувни кўриб чиқишни таклиф қилдилар.

Давра суҳбатида пенсия ва нафақалар тайинлаш учун аризаларни ҳисобга олишнинг электрон шаклига ўтиш, бунда қоғоз шаклидаги қайд этиш китобларини бекор қилиш, пенсия ва нафақаларни ўз вақтида молиялаштириш ҳамда ҳар ойнинг 27-санасига қадар тўлиқ етказиб бериш устидан доимий мониторинг олиб бориш ишлари юзасидан қизғин фикр алмашилди.

Меҳнат ва ижтимоий масалалар қўмитаси аъзолари, Олий Мажлис ҳузуридаги Қонунчилик муаммолари ва парламент тадқиқотлари институти мутахассислари билан биргаликда мазкур соҳадаги халқаро тажриба ўрганилгани, бу тизимдаги қонунчилик базасини такомиллаштиришда муҳим аҳамият касб этиши таъкидланди.

Якунда соҳага ахборот-коммуникация технологияларини кенг жорий этиш, архивлар фаолиятини янада ривожлантириш, фуқароларнинг ортиқча оворагарчилигини камайтириш, бюрократик тўсиқларни бартараф этиш юзасидан тегишли таклиф ва тавсиялар ишлаб чиқилди.
Зиёда АШУРОВА.
 

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?