Иллюстратив фото

Фарғонада Беларуснинг машҳур қуюлтирилган сутини ишлаб чиқариш йўлга қўйилиши мумкин. Бу ҳақда Беларуснинг Ўзбекистондаги элчихонаси маслаҳатчиси Александр Соловьёв маълум қилди, деб хабар берди Спутник.  Унинг сўзларига кўра, Беларуснинг Рогачёв сут-конверса комбинати маҳсулотлари, хусусан, қуюлтирилган сут (сгущёнка), қуруқ сут ва қаймоғи олинмаган сути МДҲ мамлакатларида жуда машҳур.

“Ҳамкорликнинг асосий мавзуларидан бири сутни қайта ишлаш ва гўшт саноати соҳасида қўшма корхона ташкил этиш”, - деди Александр Соловьёв .
Ўзбекистонда сут маҳсулотларини ишлаб чиқаришни йўлга қўйиш учун янги фермалар барпо қилиш ва сут соғиб олиш ҳажмини кўпайтириш кераклигини қайд этди. Шунингдек, бу ишларни амалга оширишда иштирок этиш режалаштирилаётганини қўшимча қилди.

Фарғона шаҳрида халқаро инвестиция форуми иш бошлагани ҳақида хабар бергандик. 

Форумда Жанубий Корея, Хитой, Саудия Арабистони, Россия, Эрон, Туркия, Беларусь каби 27 давлатнинг йирик инвесторлари иштирок этмоқда. Форум давомида Ўзбекистоннинг хорижий давлатлардаги элчихоналари билан биргаликда вилоятга тўғридан-тўғри инвестицияларни жалб килиш бўйича келишувлар имзоланиши кўзда тутилган.