Бугун пойтахтимиздаги “Зарафшон” концерт залининг медиа залида “Ўзбеккино” Миллий агентлиги ва Ўзбекистон Киноарбоблари ижодий уюшмаси ҳамкорлигида “Миллий кинематографияни ривожлантириш чора-тадбирлари натижадорлиги ва навбатдаги устувор вазифалар” бўйича кинофорум бўлиб ўтмоқда.

Форум аввалида “Ўзбеккино” Миллий агентлиги Бош директори Фирдавс Абдухолиқов сўзга чиқиб, кириб келаётган 2020 йил – Янги йил байрами билан барчани табриклади. Шундан сўнг, Ўзбекистон Республикаси Бош вазири Абдулла Арипов бошчилигида “Миллий кинематографияни ривожлантириш чора-тадбирлари натижадорлиги ва навбатдаги устувор вазифалар” бўйича баённома имзоланганини, бу миллий кинони ривожлантириш бўйича бир қатор вазифалар белгиланганлигини таъкидлади ва ушбу вазифалар билан форум қатнашчиларини таништирди.

Қайд этилишича,

- “Ўзбеккино” Миллий агентлиги буюртмасига асосан суратга олинаётган “Илҳақ”, “Ибрат” ва “101-рейс” фильмлари ва бошқа кино маҳсулотлари учун 17 млрд. сўм, ёш кино ижодкорлар учун етарли шарт-шароит яратиш мақсадида тегишли моддий-техник базасини мустаҳкамлаш учун – 600 млн. сўм ажратилиши белгиланган.

- 2020 йилда реконструкция учун Инвестиция дастурига “Алишер Навоий номидаги кино саройи” ДУК, “Республика кинопрокат маркази” ДУК, “Дўрмон” киноижодкорлар уйи” ДУК, “Қорақалпоқфильм” ДУК сингари иншоотлар киритилган.

- Инвестиция дастурига киритилган объектларни реконструкция учун 20 млрд . сўм ажратилган.

- Икки йилда бир маротаба “Тошкент” халқаро кинофестивали ўтказилади.

- Ўзбекистон кино санъати музейи фаолияти янада ривожлантирилади.

- Самарали фаолият олиб бораётган ва истиқболли киноижодкорлар Тошкент шаҳрида доимий прописка қилинади.

- Миллий фильмларни сақлаш, хориж архивларида сақланаётганларини қайтариш, уларни реставрация қилиш, рақамлаштириш фаолияти билан шуғулланадиган Ўзбекистон давлат фильмлар фонди ташкил этилади.

- “Ўзбекфильм” кино ишлаб чиқариш туристик комплекси” қурилади.

- “Ўзбекфильм” ДУК замонавий кино қурилмалари ва техник воситалари билан жиҳозланади.

- Кинематография институтини ташкил этиш режалаштирилган.

Форум давом этмоқда.