Бугун Қашқадарё вилоят ҳокимлигида кенгайтирилган йиғилиш ўтказилди. 

Йиғилишда дастлаб куни кеча ижтимоий тармоқларда тарқалган Миришкор тумани ҳокими Бахтиёр Ражабовнинг аудиоси ва Яккабоғ туманидаги фермер ишчилари ўртасида низолар муҳокама этилди.

“Иш фаолиятимизнинг кўп қисми ҳокимлар ва раҳбарларни тартибга чақириш билан ўтиб кетяпти. Миришкорнинг зўравон ҳокими ўз ҳатти-ҳаракати билан вилоят номига доғ туширди. Бирор бир ҳокимдан яхши ташаббус кўрмаймиз, одамларни турмуш-тарзини яхшилаш мақсадида улар таклиф ҳам бермайди. Афсуски, замон ўзгараётганини сиз раҳбаралр сезмаяпсизлар”,-дея келтиради Қашқадарё вилояти ҳокими Зойир Мирзаевнинг сўзларини “Nasafnews” манбаси.

Зойир Мирзаев Яккабоғдаги фермер ишчиси аёллар устига керосин сепиб, ёқиб юборишга уриниши билан боғлиқ ҳолатни раҳбарларнинг уқувсизлиги билан боғлади ва туманнинг айрим мутасаддилари адолатсиз қарор чиқарганини танқид қилди.

Шунингдек, туман ҳокими ўринбосарлари аҳоли ўртасида қабул ўтказмагани, кўчма қабуллар йўлга қўйилмаганини ҳам танқид қилиниб, бу борада мутасаддиларга топшириқлар берилди.

Йиғилишда вилоят ҳокими Миришкор тумани ҳокими Бахтиёр Ражабовнинг хатти-ҳаракати Регламент ва одоб комиссияси ва депутатлар иштирокида муҳокама этилиши лозимлигини ҳам айтиб ўтди.