Киношунос Шоҳира Рауфбоева  Франциядан махсус “Халқ сўзи online” учун хабар қилади: Жорий йилнинг 8-19 май кунлари Францияда бўлиб ўтадиган 71-Канн халқаро кинофестивалида илк бор “Uzbekistan” павильони ташкил этилди.

Гарчи “Ўзбекфильм” маҳсулотлари орасида миллий қадриятлар ва анъаналаримиз тараннум этилган фильмлар талайгина бўлса-да, шу пайтга қадар халқаро анжуманларда намойишга қўйилмаганди. Бинобарин, яратилаётган ҳар бир фильм — хоҳ у ёшларбоп, хоҳ болаларга мўлжалланган ёки оммабоп бўлсин навқирон авлоднинг ички дунёси, маънавиятига ижобий таъсир этувчи омилга айлантириш бугунги кун талабидир. 

Ўтган йили “PROlogue” республика ёш киноижодкорларининг қисқа метражли фильмлар фестивалининг ташкил этилиши соҳада янгилик сари илк қадам ҳисобланган бўлса, эртага ўз ишини бошлайдиган жаҳондаги энг нуфузли Канн фестивалида илк бор “Ўзбекистон” павильонининг ташкил этилиши илк муваффақиятдир. Ушбу павильонда фестиваль иштирокчилари ва меҳмонларига юртимизнинг юксак туристик салоҳияти, фильм суратга олиш учун бой имкониятлар намойиш этилади. Бу хорижлик кинокомпаниялар билан самарали ҳамкорликни йўлга қўйиш, энг асосийси, Тошкент шаҳрида бўлиб ўтадиган “PROlogue — 2018” халқаро фестивалига дунёнинг турли бурчагидан мутахассис ва ёш киноижодкорларни жалб этиш имконини беради. 

— “Ўзбекистон” павильонида тақдим этиладиган тарихий-меъморий обидаларимиз, юртимиз табиатини акс эттирувчи кино журналлар ва бошқа тарқатма материаллар хорижлик киносаноати вакилларини эътиборсиз қолдирмайди,—дейди  Ёш киноижодкорлар кенгаши раиси Ойбек Абдушукуров.— Бундан ташқари япониялик киноижодкорлар ҳамкорлигида Тошкент ва Жиззахда суратга олинган “Dragonhead”, Эрон ва Россия киноижодкорларининг Бухорода тасвирга туширган “Omar Khayyam”, шунингдек, россиялик ижодкорлар томонидан Хоразмда суратга олинган кўплаб кинокартиналар ҳақида ҳам маълумотлар берилади. Буларнинг барчаси, шубҳасиз, юртимизнинг нафақат кино санъати ва саноати, балки туристик салоҳиятини ҳам оширишга хизмат қилади.

Гарчанд “Ўзбекистон” павильонида безатиш ишлари тўлиқ тугалланмаган бўлса-да, аллақачон жаҳон кинемотографлари, кино саноати вакилларининг юртимизнинг кино ва туристик салоҳиятига қизиқиши ортиб бормоқда. 
"Халқ сўзи" мухбири Мавжуда ХОЛМАТОВА ёзиб олди.