Жомбой туманида ҳудуднинг географик жойлашуви ҳисобга олиниб, тадбиркорлар томонидан 1 та меҳмонхона, 2 санаторий, 1 та ҳайвонот боғи, 15 та дам олиш маскани ва 21 та бошқа йўналишлар бўйича туристик масканлар қуриш лойиҳалари ишлаб чиқилган. Туристик масканлар халқаро аҳамиятдаги М-39 йўлига яқин ҳудудларда бунёд этилади.

— Бугунги кунда 1,5 минг нафар маҳаллий ва 250 нафар хорижий фуқароларга хизмат кўрсатилиб, йиллик бюджетга 10 миллион сўмлик тушум ундирилмоқда, — дейди туман ҳокими Қ.Собиров. - Бу мавжуд имкониятларни ҳисобга олсак жуда кам. Биргина Зарафшон миллий қўриқхонасининг имкониятидан ҳам етарлича фойдалана олмаяпмиз. Лойиҳалар тўлиқ ишга туширилиши билан 2020-2021 йилларда 50 минг нафар хорижий фуқарога хизмат кўрсатилади. Натижада бюджетга 5 миллиард сўм тушум туширилишига эришилади. Лойиҳалар амалга ошиши натижасида 480 та янги иш ўрни яратилади

Шунингдек, зиёрат туризмини ривожлантириш учун ҳудуддаги 10 яқин маҳаллада жойлашган муқаддас қадамжолар ободонлаштирилади.

Абдулазиз Йўлдошев
(Халқ сўзи)