Индонезия, Таиланд ва Шри-Ланкада кузатилган кучли ёғингарчилик ҳамда сув тошқинлари оқибатида ҳалок бўлганлар ёки жароҳат олганлар орасида Ўзбекистон фуқаролари йўқ, деб хабар бермоқда Ўзбекистон Ташқи ишлар вазири матбуот котиби Аҳрор Бурхонов.

«Индонезия, Таиланд ва Шри-Ланкада кузатилган кучли ёғингарчилик ҳамда сув тошқинлари оқибатида кўплаб инсонларнинг ҳалок бўлгани ҳақидаги хабарни чуқур қайғу билан қабул қилдик. Марҳумларнинг оила аъзолари ва яқинларига ҳамдардлик билдирамиз. Жароҳат олганларнинг тез фурсатда соғайиб кетишларини тилаймиз», — дейилади ТИВ вакили хабарида.

Унинг қўшимча қилишича, Ўзбекистон Республикасининг тегишли дипломатик ваколатхоналари юзага келган фавқулодда вазият бўйича маҳаллий ҳокимият органлари билан доимий алоқа ўрнатган. Ҳозирги вақтга қадар ҳалок бўлганлар, бедарак йўқолганлар ёки жароҳат олганлар орасида Ўзбекистон фуқаролари йўқлиги маълум қилинган. Вазият ТИВ ва хориждаги тегишли ваколатхоналаримиз томонидан доимий назоратга олинган.

Бурхонов, шунингдек, зарурат юзага келганда ёрдамга муҳтож фуқаролар қуйидаги рақамларга мурожаат қилишлари мумкинлигини билдирди.

Ўзбекистоннинг Индонезиядаги Элчихонаси:

• +62 811 10 67 73 29;
• embassyuzbekistan@gmail.com

Ўзбекистоннинг Покистондаги Элчихонаси (Шри-Ланкадаги фуқароларимиз учун):

• +92 51 226 47 46;
• +92 3000 340 144.

Ўзбекистоннинг Бангкокдаги Бош консуллиги:

• +66-2 675-3995;
• +66-2 675-3996.

Эслатиб ўтамиз, аввалроқ, Индонезия, Таиланд, Вьетнам, Малайзия ва Шри-Ланкада содир бўлган сув тошқинлари ва кўчкилар камида 326 кишининг ҳаётига зомин бўлгани ҳақида хабар берган эдик.