Фото: ИИББ

2023 йил, 11 март куни соат тахминан 13:00 ларда Олмазор тумани, Аҳмад Дониш кўчасидаги “Тахтапул” кўприги устида учта автомобиль иштирокида юз берган тўқнашув оқибатида икки фуқаро ҳалок бўлди. Бу ҳақда Тошкент шаҳар ИИББ хабар бермоқда.

Қайд қилинишича, 20 ёшли ҳайдовчи «Changan» русумли автомашинани бошқариб кетаётиб, йўл четида ҳаракатсиз тўхтаб турган 41 ёшли ҳайдовчи Б.К.га тегишли “Matiz” русумли автомашинаси билан тўқнашув содир этган. Шундан сўнг у бошқарувни йўқотиб, бошқа йўналишда ҳаракатланиб кетаётган 38 ёшли ҳайдовчи Ф.Х.нинг «Cobalt» русумли автомашинасига бориб урилган.

ЙТҲ натижасида «Matiz» автомашинаси йўловчилари 38 ёшли T.A. ҳамда 20 ёшли А.Ғ. олган тан жароҳатлари оқибатида воқеа жойида вафот этган.

Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 3-қисми билан жиноят иши қўзғатилган. Тергов ҳаракатлари олиб борилмоқда.