Фото: "Халқ сўзи"

Фарғона вилояти Ёзёвон туманидаги «Юқори Сойбўйи» МФЙ ҳудудида 65 гектар майдонда «Янги Ўзбекистон» массивининг қурилиши бошланди.

Замонавий шаҳарсозлик меъморчилиги анъаналари асосида ишлаб чиқилган лойиҳа уч йилга мўлжалланган бўлиб, биринчи босқичда 33 та 5 ва 7 қаватли 948 та хонадондан иборат уйлар қурилиши режалаштирилган. Лойиҳада имкониятдан келиб чиқиб, кўп қаватли уйлар қуриш ҳажмини янада ошириш мумкинлигига эътибор қаратилган.

Иккинчи босқичда 29 та, учинчи босқичда 24 та, тўртинчи босқичда 52 та кўп қаватли уйлар қурилиб, «Янги Ўзбекистон» массивида ҳаммаси бўлиб 138 та кўп қаватли турар-жойлар 3 минг 856 оилани ўз бағрига олади.

Янги шаҳарчада «Янги Ўзбекистон» боғи, Маданият саройи, мактаб ва боғчалар, поликлиника, хизмат кўрсатиш ва савдо марказлари ҳам қуриш ва аҳоли учун қулай инфратузилма яратиш кўзда тутилган. Ўз навбатида ҳудудда тадбиркорлик субъектлари фаолиятини йўлга қўйиш, иссиқхоналар ташкил этиш орқали бу ерга кўчиб келувчилар бандлиги таъминланади.

Фарғона вилояти ҳокими Хайрулло Бозоров «Янги Ўзбекистон» массивида режалаштирилган қурилиш лойиҳаси билан танишиб, мутасаддиларга ўз таклиф ва амалий тавсияларини берди.

Ботир Мадиёров, «Халқ сўзи».