Давлатобод туманида жойлашган “Янги Ўзбекистон — ёшлар зиё маскани ахборот-кутубхонаси" да Наманган вилояти Рус миллий маданий маркази томонидан "Живая классика" халқаро кўрик танловининг Республика босқичи ташкил этилди. Унда юртимизнинг барча вилоятларидан келган 11 ёшдан 17 ёшгача бўлган иштирокчилар машҳур асарлардан парчаларни монолог тарзида ижро этиб, ўзларининг сўзамоллик маҳоратларини намойиш этдилар.

— Ушбу танловнинг республика босқичи ҳар йили Тошкент шаҳрида ўтказилар эди. Бу йилгисини эса Наманган вилоят Халқ таълими бошқармаси, тармоқ Касаба уюшмаси Наманган шаҳар Кенгаши ҳамда "Янги Ўзбекистон — ёшлар зиё маскани ахборот-кутубхонаси" билан ҳамкорликда гуллар шаҳрида ўтказмоқдамиз, — дейди Наманган вилояти рус миллий маданий маркази директорининг ўринбосари, "Живая классика" халқаро кўрик-танловининг Ўзбекистондаги вакили Азиза Мирзаназарова. — Бу ўз ўрнида меҳмонларга кундан кунга обод бўлиб бораётган шаҳримиз манзаралари билан яқиндан танишиш имконини ҳам берди.

Маълумот ўрнида, ушбу танлов 2017 йилдан буён мунтазам ўтказилиб келинади. Ғолиб бўлган уч нафар иштирокчига Россия Федерациясининг Қрим шаҳрида жойлашган дунёга машҳур «Артек» халқаро болалар оромгоҳига йўлланма берилади.

Қудратилла НАЖМИДДИНОВ
(«Халқ сўзи»)