Владимир Норов Европада Хавфсизлик ва ҳамкорлик ташкилоти Бош котиби Ҳелга Шмид билан учрашди

20:36 16 Ноябрь 2022 Сиёсат
532 0

Фото: Ташқи ишлар вазирлиги матбуот хизмати

2022 йил 16 ноябрь куни Ўзбекистон Республикаси Ташқи ишлар вазири Владимир Норов мамлакатимизга бир қатор йирик халқаро тадбирларда иштирок этиш учун ташриф буюрган Европада Хавфсизлик ва ҳамкорлик ташкилоти Бош котиби Ҳелга Шмид билан учрашди.

Учрашувда Ўзбекистон ва ЕХҲТ ўртасидаги ҳамкорликнинг кенг кўламли масалалари муҳокама қилинди.

Қайд этилганидек, сўнгги йилларда Ўзбекистон билан Ташкилот ўртасидаги муносабатлар сезиларли даражада фаоллашиб, сифат жиҳатидан янги босқичга кўтарилди.

2021-2022 йилларда Ўзбекистонда ЕХҲТ лойиҳаларини амалга ошириш бўйича 2021 йил апрель ойида қабул қилинган Амалий чора-тадбирлар режасини (Йўл харитаси) амалга ошириш юзасидан фикр алмашилди.

Ташкилот фаолиятининг барча уч йўналиши бўйича турли йўналишларда янги қўшма лойиҳаларни ишлаб чиқиш масалалари муҳокама қилинди.

Ўзбекистон ташқи ишлар вазири ЕХҲТ делегациясини Ўзбекистоннинг минтақавий сиёсати, хусусан, Марказий Осиёни хавфсизлик, барқарорлик ва изчил тараққиёт минтақасига айлантириш, жаҳон иқтисодий ва транспорт алоқаларига интеграциялашуви ҳақида батафсил маълумот берди.

Х.Шмид Ўзбекистон Президенти Шавкат Мирзиёевнинг минтақада ҳамкорлик ва яхши қўшничиликни ривожлантириш бўйича қулай шарт-шароит яратиш борасидаги саъй-ҳаракатларини юқори баҳолади.

Экология ва атроф-муҳитни муҳофаза қилиш соҳасидаги ҳамкорликни фаоллаштириш, жумладан, иқлим ўзгариши билан боғлиқ хавфсизлик хавф-хатарларига жавоб чораларини кучайтириш, табиий ресурслардан фойдаланиш, Орол денгизи экологик ҳалокатини бартараф этишга алоҳида эътибор қаратилди.

Томонлар Афғонистондаги бугунги вазият, афғон халқига инсонпарварлик ёрдами кўрсатиш борасида ҳам фикр алмашдилар.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?

Кўп ўқилганлар

Янгиликлар тақвими

Кластер