Уйчи туманининг «Пастгузар» маҳалласида барпо этилган кўп қаватли уйлар калити ўз соҳибларига тантанали равишда топширилди. Маросимда Наманган вилояти ҳокими вазифасини бажарувчи Ш. Абдураззоқов иштирок этди.

«Қишлоқ қурилиш инвест» МЧЖ буюртмаси билан қурилган ушбу 4 та тўрт қаватли бинолар 2-3 хонали жами 96 та хонадондан иборат. Шинам ва барча замонавий шарт-шароитларга эга бўлган уйларни 10-ХМКК , «Олмос Уйчи», «Стандарт», «Диамонд мега билдинг» корхоналарининг қурувчилари бунёд этдилар.

Эътиборли жиҳати, янги уйдаги хонадонларнинг бир қисми ижтимоий ҳимояга муҳтож оилаларга ажратилди.Ногиронлиги бўлган шахслар, ёш оилалар ва оғир ижтимоий вазиятга тушиб қолган аёллар, кам таъминланган уй-жойсиз фуқаролардан 31 нафарига (улардан икки нафари «Меҳрибонлик уйи» тарбияланувчиси) дастлабки тўлов — 14 миллион сўм тўлаб берилди. Шунингдек, 21 нафар меҳнат мигранти оиласи ва 44 нафар уй-жойга эҳтиёжманд фуқаро ҳам мазкур уйларга кўчиб ўтди.

Маросимда сўз олган Ш. Абдураззоқов янги уй эгаларини қувончли кун билан табриклади. Бир қатор хонадонларга кириб, уй соҳибларига эсдалик совғаларини топширди.

Қудратилла НАЖМИДДИНОВ,
«Халқ сўзи».