Архив сурат

Транспорт прокуратураси туризм фаолиятини амалга ошириш билан шуғулланувчи бир нечта субъектларининг фаолиятини тўхтатишни сўраб Туризм қўмитасига хат йўллади. Бу ҳақда “Дарё” ўз манбаларига таяниб хабар бермоқда.

Транспорт прокуратураси Ўта оғир жиноятларни тергов қилиш бўлими томонидан туризм фаолиятини амалга ошириш билан шуғулланувчи бир нечта субъектларининг фаолиятини тўхтатиб туриш бўйича Туризм қўмитаси раиси Умид Шодиевга хат йўллаган.

Хатда айтилишича, номлари келтирилган (расмда) туризм фаолиятини амалга ошириш билан шуғулланувчи тадбиркорлик субъектларининг мансабдор шахсларига нисбатан Жиноят кодексининг тегишли моддалари билан қўзғатилган жиноят иши юзасидан дастлабки тергов ишлари олиб борилмоқда.

Жиноят иши ҳужжатларига кўра, “Panorama Airways” МЧЖ ва юқорида қайд этилган туризм фаолиятини амалга ошириш билан шуғулланувчи бир нечта тадбиркорлик субъектлари умра тадбирлари учун 3 минг 931 нафар Ўзбекистон фуқароларининг жуда кўп миқдордаги пулларини алдаш ва ишончини суиистеъмол қилиш йўли билан қўлга киритиб, уларни Саудия Арабистонидан Ўзбекистонга қайтаришни ваъда қилган бўлса-да, Ўзбекистонга қайтармаган.

Ҳозирда минглаб Ўзбекистон фуқаролари чет элда Ўзбекистонга қайтиш имкониятсиз қолиб кетганлиги боис жиноят иши бўйича тўпланган дастлабки маълумотларга кўра, “Panorama Airways” МЧЖ билан ҳамкорлик қилган, яъни юқорида санаб ўтилган туроператорларнинг ушбу соҳада фаолият олиб боришга рухсат берувчи ҳужжатининг амал қилишини қонунда белгиланган тартибда ўз фаолиятингиз доирасида тўхтатиб туриш масаласини кўриб чиқишингизни сўрайман, — деган Ўта оғир жиноятларни тергов қилиш бўлими бошлиғи, адлия маслаҳатчиси А.Д.Ибраҳимов.

Аввалроқ, “Panorama Airways” томонидан парвозларнинг кечикиши туфайли Ўзбекистон фуқаролари умра сафаридан қайта олмаётгани ҳақида хабар берилган эди. Бош прокуратура ҳолат юзасидан жиноят иши қўзғатилган.