Фото: AP

Италиялик мутахассис Антонио Контенинг айтишича, «Тоттенхэм» бош мураббийи бўлиш унинг фаолиятидаги энг катта қийинчилик. Унинг фикрича, ҳозирда клуб йиллар давомида стандартларнинг бузилишига йўл қўйгани учун товон тўламоқда.

Премьер-лигада тўққизинчи ўринни эгаллаб турган «Тоттенхэм» Конте бош мураббий бўлганидан бери ўтказган тўртта ўйиннинг иккитасида ғалаба қозонди. Жамоа ўтган ҳафта Европа Конференциялар Лигасида Словениянинг «НС Мура» клубига 2:1 ҳисобида мағлуб бўлди.

Конте бугунга қадар «Ювентус» билан А Серия (Италия чемпионати)нинг учта чемпионлигини қўлга киритган, «Челси» мураббийи бўлган даврида эса Премьер-лига (Англия чемпионати)да ғолиб чиққан ва Англия кубогини ютган.

Шунингдек, у бош мураббий сифатида «Интер»ни охирги 11 йил ичида биринчи марта Италия чемпионатида ғалаба қозонишига эришган.

«Тоттенхэм» ҳақида берган интервьюсида италиялик мутахассис қуйидаги фикрларни қайд этди:

— Бу фаолиятим давомидаги энг катта қийинчилик. Менда жуда катта иштиёқ бор. Энди муҳими, жамоада яхши база ярата олиш.

Клуб сўнгги йилларда ўз даражасидан анча тушиб кетди. Мен «Челси»да фаолият юритган пайтларимда «Тоттенхэм» жуда кучли ва рақобатбардош жамоа эди. Энди биз яхши жамоани яратишимиз, ҳаммасини қайтадан бошлашимиз керак... Бизга бироз вақт керак, лекин мен кўп нарсани яхшилашимиз мумкинлигига аминман.